Azalaïs de Porcairague, Porcairagues

Azalaïs de Porcairague.

Ar em al freg temps vengut,

Qu' el gels, e 'l neus, e la faigna,
E ill auzelet estan mut,
C' us de chantar non s' afraigna
E son sec li ram pels plais,
Que flors, ni fuelha no i nais,
Ni rossignols non i crida
Que l' an en mai nos reissida.

Tant ai lo cor deseubut,
Per qu' ieu sui a totz estraigna;
E sai que l' om a perdut
Molt plus tost qu' om non gazaigna.
E s' ieu faill ab motz verais,
D' Aurenga me mov l' esglais;
Per qu' ieu n' estauc esbaida,
E 'n per solatz en partida.

Domna met mout mal s' amor,
Que ab trop ric hom plaideia,
Ab plus aut de vavasor;
E cil que o fai folleia.
Que Ovidy o retrai,
Qu' amors per ricor non vai;
E domna que n' es chausida,
En tenc per envilanida.

Amic ai de gran valor,
Que sobre totz seingnoreia;
E non a cor trichador
Vas me, que s' amor m' autreia.
Ieu dic que m' amors l' echai;
E cel que diz que non fai,
Dieus li don mal' escarida;
Qu' ieu m' en teing ben per guarida.

Bels amics de bon talan,
Son ab vos totz jornz en gatge,
Corteza e de bel semblan;
Sol no m demandes outrage,
Tost en venrem a l' assai,
Qu' en vostra merce m metrai:
Vos m' avetz la fe plevida
Que no m demandes faillida.

A dieu coman Bel Esgar,
E plus la cieutat d' Aurenza,
E Gloriet, e 'l Caslar, (: Castellar)
E lo senhor de Proenza,
E tot quan vol mon ben lai;
Mas lai on son fait l' assai,
Cellui perdei c' a ma vida,
E 'n serai totz jornz marrida.

Joglars, que avetz cor gai,
Ves Narbona portatz lai
Ma chanson, ab la fenida,
Lei cui jois e jovens guida.