LI, On hom plus aut es pueiatz,

LI.

On hom plus aut es pueiatz,

Mais pot en bas chazer,

Si no sap retener

Lo sentier don es guidatz;

Per que devon temer

Baissar e dechazer

Venecian, qu' en l' aut grat

D' auzor pretz an pueiat,

E Genoes, qu' eissamen

Vivon de pretz manen,

Quar solion far tot lur afar ab deu,

Mas er fan pieg que si fosson Judeu.

Quar Judeus ni reneiatz

Non deuria voler

Preizonniers destener

Ab sos guerriers acordatz;

E lur ven a plazer

Prop dos mil pres tener,

Ben qu' il sion acordat;

Qu' a tort et a pechat

En moran tuit malamen,

E sabon veramen

Qu' a negun dels tan no valon li sieu

Que ja per els si dechaia ni s leu.

Mas ergueillz e vanitatz

Venzon tan lur saber

Qu' entr' els non pot valer

Deus ni merces ni pietatz;

E par ben s' ieu dic ver,

Quant sol per far parer

Qu' il se tengron per paiat

Dels pres, com an coindat

Laisson morir tanta gen;

Don prec l' Omnipoten

Qu' ir' e dolor tos temps lor don en feu, 

Si los prezos non deliuran en breu.

E car estz faitz s' es cargatz

D' angoissos desplazer,

Tan no m dei abstener

Qu' alques no y sia nomatz

Cel qui l' ac en poder,

E ill fez tal fin aver

On non ac ges voluntat

Que foson deliurat

Li las prizonier dolen,

Qu' ab semblan solamen

Qu' ages tengut lur remaner per greu,

D' ambas las partz los agra vistz a leu.

Hai! reis frances, pueis vos platz

Metr' en deu mantener

Cor e cors et aver,

Tan que us n' etz per totz lauzatz,

Com pot tals faigz caber

En vostre captener?

Mout n' avez pretz oblidat,

Mas deus per sa pietat

En oblida 'l venjamen,

Qu' estiers crei fermamen

Qu' est pasatges de l' autr' en segra 'l treu, 

Si no us en fai la degna crotz man leu.

Honors de crestiantat,

Deus vos don voluntat

Qu' en fasatz esmendamen,

Qu' eslueingna de turmen

Los las, qu' estiers en moran tuit en breu,

Quar sol ab precs o podetz far mout leu.

Anz qu' aia 'l chant afinat,

Deus en a 'l rei jutjat

A mort, et a greu turmen

Sai e lai mainta gen,

Don taing que pes de far l' esmend' en breu

Lo novels reis per s' onor e per deu.

Barthélemi Zorgi.