Bérenger de Palasol. Aital dona, cum ieu sai,

Bérenger de Palasol.

Aital dona, cum ieu sai, 

Rich' e de bellas faissos, 

Ab cors covinent e guay, 

Ab digz plazentiers e bos,

Si volgues precs ni demanda sufrir,

Degr' om honrar, car tener e servir;

Que no y falh re qu'en bona dompna sia,

Mas quar Amors y pert sa senhoria.

Sobre las melhors val mai, 

Et es la genser qu' anc fos; 

Mas tan a ric pretz veray, 

E tant es sos cors joyos,

E tan gen sap tot quan vol far e dir,

E tan se fai als plus honratz grazir,

Qu'en pren orguelh, qu' es contra drudaria;

Veus tot lo mal qu' ieu dir en sabria.

Amar e temer se fay

Soven a manht enueyos, 

En cuy pauc de ben estai:

Mas ab un semblan ginhos,

Et ab belhs digz, o sab tan gen cubrir,

Per qu' om de lieys no s pot claman partir;

Q' us no s' en part, si son vol en seguia,

Que no y volgues tornar en eys lo dia.

Anc no s volc metr' en assai

De nulh fait aventuros, 

Per que pogues en folh plai

Venir sos pretz cabalos.

Totz sos faitz sap acabar e complir

Ab segur sen, ses reguart de falhir, 

E ses mal gienh, ses blasme, ses folia,

Ses enueg dir e senes vilania.

Quar denha sufrir, ni 'l plai

Qu' ieu la laus' en mas chansos,

Del sobregran gaug que n' ai

M' es complitz lo guazardos,

Sol que y saubes tan ben esdevenir 

Cum agra cor e talan e dezir

E gran razo, pus me en par n' auria,

Mas no sai dir lo be que y tanheria.

Dompna, no puesc de vos lauzar mentir,

Que tot lo bes y es qu'en puesc' om dir,

E mais n' i a que hieu dir no sabria,

E 'l remanens cap en vos tota via.