Giraud Riquier.
I.
Ab plazen
Pessamen
Amoros,
Ai cozen
Mal talen
Cossiros,
Per qu' el ser no puesc durmir
Ans torney e vuelf e vir,
E dezir
Vezer l' alba.
Per trebalh
Que m' assalh,
Ser e jorn
Joys me falh,
Don nualh
Ab cor morn,
E 'l ser dobla m mon martir,
Qu' en elh tenc tot mon albir,
E dezir
Vezer l' alba.
Mals sabers
Es loncs sers
Per velhar
Ses plazers
E jasers
Ses pauzar,
E ben amars ses jauzir;
Per qu' el ser velhan sospir,
E dezir
Vezer l' alba.
A mon dan
Per semblan
Fa gran nueg,
Quar afan
N' ay trop gran
Et enueg,
Quar leys qu' ieu am non remir;
Ans pes co m' en puesc aizir,
E dezir
Vezer l' alba.
II.
L' autre jorn m' anava
Per una ribeira
Soletz delichan,
Qu' amors me menava
Per aital maneira
Que pesses de chan,
Vi guaya bergeira
Bell' e plazenteira
Sos anhels gardan;
La tengui carreira,
Trobei la fronteira
A for benestan,
E fe m belh semblan
Al primier deman.
Qu' ieu li fi demanda:
“Toza, fos amada
Ni sabetz amar?”
Respos me ses guanda
“Senher, autreyada
Mi suy ses duptar.
- Toza, mot m' agrada
Quar vos ai trobada,
Si us puesc azautar.
- Trop m' avetz sercada;
Senher, si fos fada,
Pogra m' o pessar.
- Toza, ges no us par?
- Senher, ni deu far.”
“Toza de bon aire,
Si voletz la mia,
Yeu vuelh vostr' amor.
- Senher, no s pot faire;
Vos avetz amia
Et yeu amador.
- Toza, quon que sia,
Ye us am, donc parria
Que us fos fazedor.
- Senher, autra via
Prenetz tal que us sia
De profieg maior.
- Non la vuelh melhor.
- Senher, faitz folhor.”
“No folley, Na toza;
Tan m' es abellida
Qu' amors m' o cossen.
- Senher, fort cochoza
Son que fos partida
D' aquest parlamen.
- Toza, per ma vida,
Trop es afortida,
Qu' ie us prec humilmen.
- Senher, no m' oblida
Trop; a! for' aunida,
Si crezes leumen.
- Toza, forsa m sen.
- Senher, no us er gen.”
“Toza, que que m diga,
Non aiatz temensa
Que no us vuelh aunir.
- Senher, vostr' amiga
Suy, quar conoyssensa
Vo' 'n fai abstenir.
- Toza, quan falhensa
Cug far, per sufrensa
Belh Deport m' albir.
- Senher, mot m' agensa
Vostra benvolensa,
Quar vos faitz grazir.
- Toza, que us aug dir?
- Senher, que us dezir.”
“Digatz, toza guaya,
Que us a fag dir ara
Dig tan plazentier?
- Senher, on que m vaya,
Gays chans se perpara
D' En Guiraut Riquier.
- Toza, ges encara
Lo ditz no s despara
De qu' ieu vos enquier.
- Senher, no us ampara
Belhs Deportz que us gara
De laus esquerrier?
- Toza, no m profier.
Senher, aus entier.”
“Toza, tot ma fara,
May 'N Bertrans m' ampara
D' Opian l' entier.
- Senher, mal si gara;
Et iretz vo' 'n ara,
Don ai cossirier.
- Toza, sovendier
Aurai est semdier.”
III.
Ad un fin aman fon datz
Per si dons respieg d' amor,
E 'l sazos e 'l luecx mandatz;
E 'l jorn qu' el ser dec, l' onor
Penre anava pessius,
E dizia sospiran:
“Jorns, ben creyssetz a mon dan!
E 'l sers
Auci m e sos loncx espers.
Tant era l' amans cochatz
De la deziran ardor
Del joy que l' er autreyatz,
Qu' elh se dava gran temor
Qu' al ser non atendes vius.
E dizia sospiran:
“Jorns, ben creyssetz a mon dan!
E 'l sers
Auci m e sos loncx espers.”
Nulhs hom non era de latz
A l' aman, que sa dolor
No conogues, tant torbatz
Era ab semblan de plor,
Tant li era 'l jorns esquius;
E dizia sospiran:
“Jorns, ben creyssetz a mon dan!
E 'l sers
Auci m e sos loncx espers.”
Mout es greu turmen astratz
A selh qu' ab nulh valedor
No s pot valer, donc gardatz
D' est aman en qual langor
Era 'l jorn d' afan aizius,
E dizia sospiran:
“Jorns, ben creyssetz a mon dan!
E 'l sers
Auci m e sos loncx espers.”
IV.
L' autr' ier trobey la bergeira d' antan
Saludei la, e respos mi la bella,
Pueys dis: “Senher cum avetz estat tan
Qu' ieu no us ai vist? ges m' amors no us gragella?
- Toza, si fa mai que no fas semblan.
- Senher, l' afan per que podetz sufrir?
- Toza, tals es qu' aissi m' a fag venir.
- Senher, et ieu anava vos sercan.
- Toz', aissi etz vostres anhelhs gardan.
- Senher, e vos en passans so m' albir.”
“Toz', al prim jorn fuy vostres ses mentir,
Pueys del vezer m' an tout afar aizina.
- Senher, aital vos puesc ieu de mi dir,
Qu' aissi quo vos m' es fis vos suy ieu fina.
- Toza, be m plai quar o sabetz grazir.
- Senher, si fas tot aissi com s' eschai.
- Toza, vulhatz donc tot so qu' ieu volrai.
- Senhe' 'l voler vostre vuelh ben auzir.
- Toza, que vuelh de vostr' amor jauzir.
- Senher, faitz o lai on yeu no serai.”
“Toza, nulhs joys ses lo vostre no m plai
D' autra del mun, ni dar no 'l me poiria.
- Senher, aquo es aissi quon ieu sai;
Mas cavalgatz e tenetz vostra via.
- Toza, no vuelh anar, ans dissendrai.
- Senher, que us val er quan etz dissendutz?
- Toza, sapchatz que serai vostres drutz.
- Senher, si us plai, entendetz que us dirai.
- Toza, digatz tost que be us entendrai.
- Senher, sejam, que ben siatz vengutz.”
“Toza, tan m' es lo deziriers cregutz
De vos jauzir, qu' ades coven a faire.
- Senher, quo us es tan tost dessovengutz
Lo vostre Belhs Deportz? no l' amatz gaire.
- Toza, si fas tant que ja so vencutz.
- Senher, s' o sap, grat vo' 'n deura saber.
- Toza, de trop vils faitz me fa tener.
- Senher, per so n' es lauzan mentaugutz.
- Toza, s' amors autre joy no m' adutz.
- Senher, no us par que vivatz ses plazer.”
“Toza, no m vol mos Belhs Deportz valer,
Ni re non vey el mon que tant me playa.
- Senher, ben cre qu' en sap far son dever,
Si a valor tant quo dizetz veraya.
- Toza, tan val que totz m' en desesper.
- Senher, avetz per lieys nul melluyrier?
- Toza, oc, tal qu' en muer de dezirier.
- Senher, ans n' es mentaugutz de saber.
- Toza, que m val? pus joy non puesc aver.
- Senher, lo joy perdetz per cor leugier.”
“Toza, 'l cor ai leyal e vertadier
Vas lieys don mortz deziran me guerreya.
- Senher, tant aug dir d' En Guiraut Riquier
Que, si no us val, no fa ren que no deya.
- Toza, no fan acreire lauzengier.
- Senher, per mi sai tot vostre talan.
- Toza, be us am, mas vos m' anatz trufan.
- Senher, autra n' ametz atertant yer.
- Toza, vau m' en, que no m' avetz mestier.
- Senher, anatz, e veia m vos autr' an.”
V.
Gaya pastorelha
Trobey l' autre dia
En una ribeira
Que per caut la belha
Sos anhels tenia
Desotz un' ombreira;
Un capelh fazia
De flors, e sezia
Sus en la fresqueira:
Dissendey en guia
Que s' amor volia;
En calque maneira
Ylh fon prezenteira,
Sonet me primeira.
Dissi li: “Poiria
De vos solatz traire,
Pus m' es agradiva?”
Ylh dis que queria
Amic de bon aire,
Nueg e jorn pessiva.
“Toza, ses cor vaire
E senes estraire
M' auretz tant quan viva.
- Senher, be s pot faire,
Quar a mon veiaire
Amors vos abriva.
- Toza, oc, esquiva.
Senher, be y 's sobtiva.”
“Toza, s' ans de gaire
No m' en faitz valensa,
Vostr' amors m' esglaya.
- Senher, ab maltraire
Conquer hom guirensa,
Donc espers vos playa.
- Toza, tant m' agensa
Vostr' amors e m tensa
Qu' ops m' es qu' ades l' aya.
- Senher, en parvensa
Mai no m vis, falhensa
Faria savaya.
- Toza, 'l vista m playa.
- Senher, donc no y 's gaya?
“Toza, tant comensa
L' amors ab martire
Qu' ops m' es vostra vida.
- Senher, ab temensa
M' avetz en dezire
Ben quatr' ans tenguda.
- Toza, no m' albire
Qu' ie us vis mai; no us tire,
Si ar etz ma druda.
- Senher, be us puesc dire
Qu' en faretz mans rire,
Suy desconoguda.
- Toza, etz esperduda?
- Senher, non, ni muda.”
“Toza, no m cossire
Tant qu' aisso entenda;
Etz ges la chantada?
- Senher, quan que us tire,
Pro er qu' ie us car venda
Vostr' amor malvada.
- Na toza, contenda
Ai ab vos d' emenda
Totas vetz trobada.
- Senhe' 'N Guiraut renda
Riquier tanh que us renda
Aital, quar sui fada.
- Toz', ans etz membrada.
- Senher, so m' agrada."
“Toza, tal fazenda
Ai qu' ops m' es que y tenda,
A dieu siatz dada.
- Senher, aissi us prenda
Per tot ses emenda,
E veus vostr' estrada.
- Toza, etz irada?
- Oc, per vostr' anada.
VI.
L' autr' ier trobei la bergeira
Que d' autras vetz ai trobada
Gardan anhels, e sezia,
E fon de plazen maneira;
Pero mout fon cambiada,
Quar un effant pauc tenia
E filava cum membrada;
E cugey que m fos privada
Per tres vetz que vist m' avia,
Tro vi que no m conoyssia,
Que m dis: “Lai laissatz l' estrada?”
“Toza, fi m' ieu, tant m' agrada
La vostra plazen paria
Qu' er m' es la vostra valensa.”
Elha m dis: “Senher, ta fada
No suy quo us pessatz que sia,
Quar en als ai m' entendensa.
- Toza, faitz hi gran falhensa,
Tant a que us am ses falcia.
- Senher, tro en aquest dia
No us vi segon ma parvensa.
- Toza, falh vos conoyssensa?
- Senher, non, qui m' entendia."
“Toza, ses vos no m poiria
Res dar d' aquest mal guirensa,
Tant a que m' etz abellida!
- Senher, aital me dizia
En Guirautz Riquiers ab tensa,
Mas anc non fuy escarnida.
- Toza, 'N Guirautz no us oblida,
Ni us pren de mi sovinensa.
- Senher, mais que vos m' agensa
Elh e sa vista grazida.
- Toza, ben trop l' es gandida.
- Senher, si ven, be cre m vensa.”
“Toza, mos gaugz se comensa,
Quar selh per qui etz auzida
Chantan suy ieu ses duptansa.
- Senher, non etz, ni crezensa
Non auria e ma vida,
Ni neys non avetz semblansa.
- Toza, Belhs Deportz m' enansa
Que us es tres vetz autz guida.
- Senher, res non es la crida,
Trop vos cujatz dar d' onransa.
- Toz', avetz de mi membransa?
- Senher, oc, mais non complida.”
“Toza, ie us ai enbrugida,
E tenc m' o a gran pezansa;
No us pessetz pus vos enqueira.
- Senher, be m tenc per fromida,
Qu' eras ai preza venjansa
De l' autra vista derreira.
- Toz', ab qui etz parieira
En l' efant? es d' alegransa?
- Senher, ab selh qu' esperansa
N' ai de mais, que m pres en gleira.
- Toza, quo us giec en ribeira?
- Senher, quar es ma uzansa.”
“Poiriam far acordansa
Amdos, toza plazenteira,
Si n' eratz per mi celada.
- Senher, non d' autr' amistansa
Que ns fem a la vetz primeira,
Pus tro aissi m suy gardada.
- Toza, be us ai assajada,
E truep vos de sen enteira.
- Senher, s' ieu ne fos leugeira,
Mal m' agratz vos assenada.
- Toza, vau far ma jornada.
Senher, mete' us en carreira.
Fin du tome troisième.
