Pièces morales et religieuses.
Index:
I, Senher dieus, que fezist Adam,
II, Vers dieus, el vostre nom e de sancta Maria
III, Patz passien ven del senhor
IV, Razos es e mezura,
V, Ben volgra, s' esser pogues,
VI, Verges, en bon' hora
VII, Dieus, vera vida, verays,
VIII, Ja hom pres ni dezeretatz
IX, Pus lo dous temps ve jogan e rizen,
X, Lo pair' e 'l filh e 'l sant espirital
XI, Mantas vetz sui enqueritz
XII, Nueg e jorn suy en pensamen
XIII, Oi! Maire, filla de dieu,
XIV, Un decret fauc drechurier,
XV, Vera vergena Maria,
XVI, Dels quatre caps que a la cros
XVII, Ihesum Crist, nostre Salvaire,
XVIII, Ben es adreigz E sap qu' es alegranza,
XIX, Sirvens suy avutz et arlotz,
XX, Domna, dels angels regina
XXI, Be volria de la mellor
XXII, Cor ai e voluntat
XXIII, Luecx es qu' om si deu alegrar;
XXIV, Esperansa de totz ferms esperans
I.
Senher dieus, que fezist Adam,
Et assagiest la fe d' Abram,
E denhest penre carn e sanc
Per nos, tant fust humils e franc!
Pueis liuriest ton cors a martire,
Don mos cors en pessan m' albire
Que trop fesist d' umilitat
Segon ta auta poestat;
Dieus Ihum Crist, filh de Maria,
Senher, mostra m la drecha via,
E no y esgart los meus neletz,
E retorna m' als camis dretz.
Hueimais be s tanh qu' ieu me descobra,
Tant ai estat en mala obra!
Tost temps a me gran amareza,
E tenc mon cor en cobezeza;
Voluntiers ajustiey vas me
E non ges tot per bona fe;
Voluntiers amassey l' autrui
E non guardei ni qual ni cui,
E fui tost temps de malenconi,
E mantinc obra de demoni,
Quan me venc en cor que m partis
E que a tu ver dieu servis;
Peccatz m' azauta que me refresca,
Que m' es pus dos que mel ni bresca,
E retorna m' al recalieu
Que m' es salvatge et esquieu,
Tant me sobra peccatz mortals!
Si tu, vers dieus, doncx no m' en vals,
Tant es cozen lo mal que m toca
Que no 'l puesc comtar ab la boca,
Ni metje no m' en pot valer,
Si tu no m vals per ton plazer,
Glorios dieus, per ta merce
Dressa ta cara devan me,
E remira lo greu trebalh
C' aissi m tensona e m' assalh,
Que los mieus peccatz son per nombre,
Per tal tem que la mort m' encombre,
Qu' els mieus peccatz son massa trops,
E 'l tieu coselh m' a mot gran obs.
Gran merce te clam com hom vencut
Que m' aiut, dieus, per ta vertut;
Qu' en peccat soi natz e noiritz,
Et en peccat ai tant dormitz
C' apena vei la clara lutz
Qu' el tieu sant esperit m' adutz;
En escur vauc com per tenebras;
Malautes sui pus que de febras,
En caitivier jac et en pena
E tenc al col tan gran cadena
Que tot soi pesseiatz e franhs,
Tan fort es dura e pezans!
Glorios dieus, senher del tro,
Si t plai, delieura m de preizo;
Ab gran dolor t' apel e crit,
Senher, no m metas en oblit;
Oblidat m' as per ma folhor
Car no t servi com a senhor,
E soi pus freg que neu ni glas,
Quan me parti del tieu solas;
Glorios dieus, dona m calor
E sen e forsa e vigor
E conoissensa e saber,
Qu' ieu te serva a ton plazer.
Senher dieus, fai ne de mon cor
De totas partz dins e defor,
De tota mala voluntat,
E d' erguelh e de malvestat,
E retorna m' al tieu servici,
E salva m' al jorn del juzizi;
Glorios dieus, tramet me lum
Que m get dels huels aquel mal fum,
Aisi que sian bels e clars,
Que no sian durs ni avars,
E reconosca 'ls tieus sendiers,
C' aissi son plas e drechuriers;
Qu' ieu res no vei ni sai on so,
Ans prenc lo mal e lais lo bo;
Senher dieus, garda m del camis
Que la mort troba tan mesquis,
E de lur gran desaventura
Dels enemicx, que es tan dura.
Dieus, perdona me en ma vida
Totz mos peccatz e ma falhida,
Ans que la mortz me sobrevenga,
Quan non poirai menar la lengua;
Car penedensa del adoncx
No val a l' arma quatre joncx;
Adjuda m, dieus, tost; no moticx,
Car tost mos mortals enemicx
N' aurian gaug senes acort,
Si m podiam liurar a mort.
Senher dieus, mot m' o tenc a tala,
Car ieu no truep genh ni escala
On te pogues venir denan,
Laisus on son li gaug e 'l san.
Dieus, tu que fist tan bel miracle,
Met me el tieu sant habitacle,
Car tot mon cor e m' esperansa
Es en la tua piatansa;
Car pus greu comte que d' arena
Port de pecat sus en l' esquena;
Qu' el mon no sai hom tan deslieure
Pogues totz mos pecatz escrieure;
Mas tu, senher vers dieus, que saps
Mos pessamens e totz mos abs,
A tu non puesc esser selat
Cal fui, cal soi, cal ai estat;
Tant ai peccat que no sai nombre;
Si anc fui fols, aras soi domde,
Car peccat m' a cubert e clors,
De totas parts me tenon mortz.
Dieu, dona m genh com en partisca,
Per so que t laus e que t grazisca,
Car tu yest, dieu dos, amoros
E senher dieu tot poderos.
Veray dieu, dressa tas aurelhas
Enten mos clams e mas querelhas;
Aissi t movrai tenson e guerra
De ginolhos, lo cap vas terra,
La mas juntas e 'l cap encli
Tan tro t prenda merce de mi;
E lavarai soven ma cara,
Per tal que sia fresqu' e clara,
Ab l' aigua cauda de la fon
Que nais del cors laisus el fron;
Car lagremas e plans e plors
So son a l' arma frutz e flors.
Senher dieus, en tu ai mos precx,
En esta cocha no m denecx;
Ja soi ieu tos parens carnals
E tos parens esperitals;
Ieu soi tos filhs e tu mos paire,
Lo mieu senher e 'l mieu salvaire;
Ieu soi tos filhs, tu mos parens,
Aias de mi bos chauzimens,
Car ieu soi ples de tot peccat
E tu, senher, d' umilitat;
Tu iest fort aut et ieu trop bas,
Car peccat m' a vencut e las.
Dels enemicx me garda, senher,
Que m volon dampnar e destrenher;
Ampara m, dieus; mos esperitz,
Ans qu' en sia del tot partitz,
E dona m vida eternal
El tieu regne celestial.
Folquet de Marseille.
II.
Vers dieus, el vostre nom e de sancta Maria
M' esvelharai hueimais, pus l' estela del dia
Ven daus Iherusalem que ns essenha quec dia.
Estatz sus e levatz,
Senhors que dieu amatz,
Qu' el jorns es apropchatz,
E la nueg ten sa via;
E sia dieus lauzatz
Per nos et adoratz,
E 'l preguem que ns don patz
A tota nostra via.
La nueg vai e 'l jorns ve
Ab clar temps e sere,
E l' alba no s rete,
Ans ve belh' e complia.
Senher dieus que nasques de la verges Maria
Per nos guerir de mort e per restaurar via,
E per destruir enfern qu' el diables tenia,
E fos en crotz levatz,
D' espinas coronatz
E de fel abeuratz;
Senher, merce vos cria
Aquetz pobles onratz
Que 'lh vostra pietatz
Lor perdon lor peccatz,
Amen, dieus, aissi sia.
La nueg vai e 'l jorns ve
Ab clar temps e sere,
E l' alba no s rete,
Ans ve belh' e complia.
Qui no sap dieu preiar ops es que o aprenda
Et auia qu' ieu dirai, et escout et entenda.
Dieus, que comensamens es de tota fazenda,
Laus vos ren e merce
Del be que m faitz ancse;
E prec, senher, que us prenda
Gran pietat de me,
Que no m truep ni m malme,
Ni m' engane de re
Diables ni m surprenda.
La nueg vai e 'l jorns ve
Ab clar temps e sere,
E l' alba no s rete,
Ans ve belh' e complia.
Dieus, donatz me saber e sen ab qu' ieu aprenda
Vostres sanhs mandamens, e 'ls complis e 'ls atenda,
E 'l vostra pietatz que m guerisc e m defenda
En est segle terre,
Que no m trabuc ab se;
Quar ie us ador e us cre,
Senher, e us fauc ufrenda
De me e de ma fe,
Qu' aissi s tanh e s cove;
Per so vos crit merce
E de mos tortz esmenda.
La nueg vai e 'l jorns ve
Ab clar temps e sere,
E l' alba no s rete,
Ans ve belh' e complia.
Aquest glorios dieus qui son cors det a venda,
Per totz nos a salvar, prec qu' entre nos estenda
Lo sieu sant esperit que de mal nos defenda,
E d' aitan nos estre
Josta los sieus nos me
Laysus on si capte,
E ns meta dins sa tenda.
La nueg vai e 'l jorns ve
Ab clar cel e sere,
E l' alba no s rete,
Ans ve belh' e complia.
Folquet de Marseille.
III.
Patz passien ven del senhor
Que per nos pres carn e moric,
Volc nos rezemer del sieu sanc
Que 'l fossem ver, fizel amic;
Per so ja us non s' en estanc
Que us quecx vas lui non corra;
Que dieus nos dona tal conort
Qu' el segle fals fallit e mort;
Nos traga patz per sa doussor
Que fa als bos los mals chauzir,
E 'n patz ab patz patz obezir.
Per aquesta n' aurem maior
Patz, e vullatz qu' om non prezic
Ges non es ni er ni fon anc
En ergulhos cors fellon ric;
Per qu' ieu sospir soven e planc
Quar non pessam pus ab ora
Q' us a l' altre no fezes tort
Ni agues ira ni desconort
Mas fezes l' us a l' autr' amor
E cum pocsem a dieu servir
Que elh nos denhes aculhir.
Regart deu aver e paor
Qui sap so qu' elh per nos suffric;
Vol que siam humil e franc,
Perdonem a nostr' enemic;
Per so que de lui non s' aranc
Peccatz que fort brama e plora,
Quar li premier li son estort
Non y a un tan gran ni fort,
Si cai lains, qu' ab gran dolor
No 'l fasson ardre e blezir
Sels que fan peccar e fallir.
A nulh home no fa honor,
Ni de lur obra non jauzic,
Que no 'l tornon d' aut bas el fanc
Si co feiro 'l premier antic;
E ja no cug traspas ni manc,
Tart o temps, qu' a mala hora
Qui diable siec non la port,
De cobezeia ns planton ort
De sobre tot mal lo peior;
Per que ns podem greu d' elhs partir
Qui ben no s' en sap escrimir.
Peccatz a tan dossa sabor
Per que Adams lo pom trazic,
Del dreg just fetz fals clop e ranc
Cobezeza qu' el ne partic,
Qu' elh era assis en tal banc
Ja no saupra mals que s fora,
Et a donat estranh deport,
Ira e trebalh e desconort
A selhs qu' intran al bolidor,
Don jamais non poiran issir;
Pensem nos quo y poiren guerir.
Trichat seran li trichador
Que anc mal per pieitz non gequic,
No y aura riu, vouta ni danc
Als perjurs fals qu' a fe falhic,
Que tot denan lor no sen planc
Ni engans que no 'l secorra;
Selh es folhs quar a son tort
Del diable, quar ab sa sort
Lo n' a portat, a deshonor,
Que anc no 'l laisset repentir
En vida ni quan dec murir.
Dombre dieu prec ieu et ador
Qu' elh nos lais el sieu renc venir
Ab sos angils cans novelhs dir.
C' al comte R*** val honor
E forsa per enantir
Pretz en que totz lo mon se mir.
Comte, rey et emperador,
Avem lui per pretz enardir,
Ab patz enantir e sofrir.
Gavaudan le Vieux.
IV.
Razos es e mezura,
Mentr' om el segle dura,
Que aprenda chascus
De sels que sabon plus.
Ja 'l sens de Salamon,
Ni 'l saber de Platon,
Ni l' engeinz de Virgili,
D' Omer ni de Porfili,
Ni dels autres doctors
Qu' avetz auzitz plusors,
No fora res prezatz,
S' agues estat selatz;
Per qu' ieu soy en cossire
Com pogues far e dire
Tal re que m fos honors,
E grazit pels melhors.
Mas negus non entenda
Qu' ieu aquest fais mi prenda
Que l' encrim de folhor,
Ni m tengna per doctor.
De saber no m fenh ges,
Mas de so qu' ai apres,
Escotan e vezen,
Demandan et auzen;
Car nulhs non a doctrina
Ses autrui disciplina.
Mos sabers non es grans,
Mas qu' en tira 'l talans
D' aprendre e d' auzir
So qu' om degues grazir.
Que eys lo mieu aprenre
Si nulhs es de mi menre
De sen ni de sciensa.
Segon la conoissensa
Qu' ieu ai ni sent ni sai,
Del segle mostrarai
Com se deu captener
Qui vol bon laus aver:
Mas coven esgardar
Cum o dey comensar,
Car sens non es grazitz
Mas per los essernitz,
E s' o es, non es guaire.
Per so vuelh ieu retraire
Al rey cuy es Lerida,
Cui jois e jovens guida,
Primieiramen mos ditz
Si com los ai escritz;
Non per tal que 'l sofranha
Res qu' a bon pretz s' atanha,
Mas car es conoissens
En totz faitz avinens,
Li prec qu' el esmend me,
S' ieu y mespren en re.
Qui vol corteza vida
Demenar ni grazida,
Ab ferm cor e segur,
Per tal que son pretz dur,
Sapcha dieu retener
Et onrar e temer;
Car pretz ni cortezia
Ses dieu non cre que sia.
De totas encontradas,
Estranhas e privadas,
Aprenda de las gens
Faitz e captenemens;
E demand' et enqueira
L' esser e la maneira
Dels avols e dels pros,
Dels malvatz e dels bos:
Lo mal e 'l ben aprenga
E 'l mielhs gart e retenga;
Tot quant es deu saber
E 'l ben sol retener;
Pueis poira s mielhs defendre,
Si nuls lo vol reprendre.
Ja non aura proeza
Qui no fug avoleza,
E non la pot fugir
Qui non la sap chauzir:
Ni cortes non er ja
Qui non conois vila,
Ni bos, si dieus mi sal,
Qui non conois lo mal;
Per so no s deu tardar
D' auzir e d' escoutar
Nuls hom qu' en pretz enten,
Car, pel meu escien,
Entr' els nessis e 'ls fatz
Pot chauzir lo senatz
Tal ren qu' a lui er bos,
Et ad els non ten pros.
Qui sap sens e foldatz
Melhers n' es sos solatz;
Car li sen e li joc
An lur temps e lur loc
On se fan aretraire
Per sels qu' o sabon faire.
Del segle us dic aitan,
Segon que m' es semblan,
Selui ten ieu per pro
Que sap guardar sazo
De sas antas venjar
E 'ls bens guazardonar,
Qu' aitals es bos uzatjes;
E requier o paratjes
Qu' om sia humils als bos
Et als mals ergulhos:
Mas una re us dirai,
Segon lo sen qu' ieu ai,
Non an proeza bona
Ges tuit cill qu' om razona,
Qu' entr' els desconoissens
E per avols guirens
Es proeza jutjada,
E per mans autreiada
Qu' anc non saubron que fos
Proeza per razos.
Proezas son devizas,
E pretz de mantas guizas;
Las unas son cabals
E las autras venals;
Mas, cui que pes o plassa,
Ja no us dirai que s fassa
Pretz de gap ni d' ufana
Ab proeza certana,
C' aisso don s' asegura
Tan quant el segle dura.
Qui proeza dezira
Fols es qui non cossira
Don nais ni don soste,
Car ses aisso non cre
Que nuls hom bon pretz aia,
Qui que s' en crit ni 'n braia;
Per fals razonador
Qui non conois valor
En si ni en autrui,
No son, si be s fan brui,
Ges, avol li blasmat
Ni pros cill qu' an lauzat.
D' els no us vuelh pus parlar,
Mas laissarai estar
Los pros ab los prezatz
E 'ls nessis ab los fatz,
E si dirai als gais
De proeza don nais.
Ges no nais ni comensa
Segon autra naissensa,
Qu' ins el cor, so sapchatz,
La noiris voluntatz.
Er no us sia veiaire
S' el filhs fo de bon paire,
Hom no s' en meravilh,
Si non pareis al filh;
Terras pot hom laissar
E son filh heretar,
Mas pretz non aura ja,
Si de son cor non l' a;
Per que pretz senhoreya,
E cre que far o deya
Sobre totas honors,
E n' es caps e colors;
Paratge d' auta gen,
Poders d' aur ni d' argen
No us daran ja bon pretz,
Si ric cor non avetz,
Ric cor, sens desmezura,
Que d' autre non ai cura.
Proeza eis del coratge,
Veus son meilhor linhatge;
Et entendetz apres
Per cuy estai en pes:
Conoissensa e sabers,
Sens, largueza e poders
Donon pretz per tos temps,
Qui 'ls sap aver essems.
En aquest cinc, senz pliu,
Nais proeza e reviu.
Conoissensa e largueza
Son las claus de proeza;
Poders es la serralha,
E qui gen la baralha
Ni la sap desfermar,
Non pot guaire durar;
Per qu' el sens y cove
Que las claus gard e te;
Sabers n' es messatgiers
Cortes e plazentiers
Que dis plazers e 'ls fai
Lay on ve que s' eschai.
Ses aquest cinc no vey
Emperador ni rey,
Duc, comte ni baro
Ni nulh autre home pro
Cui pretz puesca durar,
Si be s fan razonar.
Li flac ric de paratge,
Sofraitos de coratge
Fan dir a lur privatz:
Senher, aisso sapchatz,
Mo senher fora pros
Ab qu' el poders y fos.
Aquest razonamens
Es us devinamens;
Qu' ieu no y conosc ren al,
Ni ab mi non lur val,
Ni ja no 'ls en creirai,
Car conosc ben e sai
Que tos temps fon et er
Que totz pros hom conquier,
Ab sen et ab saber
Et ab ric cor, poder.
Pero ieu ges non dic
Que cill qu' el cor an ric
Puescan far tota via
Tot quant ben estaria;
Mas qui tan quant pot fai
D' aisso qu' a pretz s' eschai,
De qualque poder sia,
Pros es senes falhia.
Pero non entendatz
Qu' ieu a totz los prezatz
Autrei proeza enteira
En neguna maneira;
En cort non o diria,
Car sai qu' ieu falhiria;
Pretz y a et honors
De diversas lauzors,
Car tug cill que pretz an
Non l' an ges d' un semblan.
Li cavalier an pretz
Si cum auzir podetz:
Li un son bon guerrier,
L' autre bon conduchier;
L' un an pretz de servir,
L' autre de gen garnir;
L' un son pros cavalier,
L' autr' en cort plazentier.
Cist aibs que us ai comtatz
Son greu essems trobatz;
Mas qui mais n' a ab se,
Mais de bon pretz rete;
E qui negun non a,
Si ja pueis li rema
Lo noms de cavalier,
No 'l tenc per dreiturier.
Las donas eissamens
An pretz diversamens:
Las unas de belleza,
Las autras de proeza;
Las unas son plazens,
Las autras conoissens;
Las unas gen parlans,
Las autras benestans.
A domna, so sapchatz,
Esta molt gent beutatz,
Mas sobre tot l' agensa
Sabers e conoissensa,
Que fai chacun onrar
Segon que s tanh a far.
Li borzes eissamens
An pretz diversamens:
Li un son de paratge
E fan faitz d' agradatge,
Li autre natural
E fan tot atretal;
D' autres n' i a mot pros,
Cortes, francx e joyos
Que lay on falh l' avers
Sabon gen dir plazers;
En cort son presentiers,
Et ades plazentiers;
E sabon de domney
De trep e de bordey;
Et estan gen garnens
Mes totz los conoissens,
Garnitz de cortezia
E de bela paria.
Dels autres no son mot,
Enans m' en lays del tot;
Qui no fai be ni 'ls ditz
No 'l lays metz los grazitz,
Ni sera en ma carta,
Ans dic ben que s' en parta.
Li clerc, per cui ancse
Sab hom lo mal e 'l be,
An pretz, si cum s' eschai,
Aital cum ie us dirai;
L' un de bona clercia,
L' autre de cortezia;
Li un de gen parlar,
L' autre de rics faitz far;
Li un de gran bontat,
L' autre de larguetat;
Et en aissi, senhors,
Diversas son lauzors
Donadas a chascun;
Mas non y a negun,
Ja celar no us o quier,
Dona ni cavalier
Ni clerc, so m' es veiaire,
Don hom puesca retraire:
Pretz aissi del tot fi
Qu' om no i trob que chasti;
Qu' aissi parti natura,
Gracia et aventura
Los dons entre las gens.
Non es uns tan valens
El segle ni tan pros
Ni tant aventuros,
De qualque poder sia,
Qu' en alcuna partia
De lauzor no il sofranha
Tal ren don se complanha.
Mas ja li pus prezat
No m' en sapchan mal grat,
S' ieu dic lurs malvestatz,
Car ieu 'ls n' ay ben proatz
Qu' ades son sordeyors
On pus an de ricors.
Doncs qui mais ditz e fai
D' aquo qu' a pretz s' eschai
Pro es aventuros,
Si melher es dels pros.
Vers es so c' aug retraire,
Qu' el temps del premier paire,
Des que cregon las gens,
Per bos captenemens
Elegron poestatz,
Per que entr' els fos patz
E merces e mezura
E largues' e dreitura
Maiormen qu' en autrui.
Mas s' eras non destrui
Chascus e non auci
Aicel que son vezi,
Non cuida esser prezatz,
Tant es otracuidatz
Lo segles descauzitz,
Dessebratz e partitz
De sen e de proeza,
E mesclat ab maleza!
Ieu o planc per joven
E pel destric que y pren
Plus qu' ieu no fas per me,
Qu' a mi non greva re;
S' el segles se dechay,
Non puesc aver esmay
De ren que veia far,
Ab sol que dieus me guar
Ma dona doss' e cara
Que m capdela e m gara
De tot autre cossir,
Mas de lieys obezir.
Dona, pros e valens
Corteza et avinens,
S' en ren ai conoissensa,
La vostra sovinensa,
Que m' es cor et escrima
La m dona e la m' aprima;
Per qu' ieu de totz mos bes
Vos ren laus e merces,
E us o grazisc ades,
Car m' es del cor pus pres,
Dona!
Arnaud de Marueil.
V.
Ben volgra, s' esser pogues,
Tot lo mal qu' ai fag desfar,
E 'l bes qu' ieu non ai fag far.
Ai! cum m' en fora ben pres,
Si 'l bes fos mals e 'l mals bes;
Aissi no m calgra doptar,
Ans fora lo bes tant grans
Qu' ieu fora pars d' un dels sans:
Aras non sai cum s' anara de me,
Tant son li mal gran e petit li be.
Tant mi sent ves dieu mespres
Qu' ieu m cuiei desesperar:
Mas vei qu' ieu non o dei far,
Car maiers es sa merces
Qu' el mieus grans peccatz non es;
Aisso m fai assegurar.
Pero ben volgra tres tans
Viure sai de jorns e d' ans
Ab sa honor, per miels trobar merce,
Cum l' ai estat fals e de mala fe.
Ben sai, si ja m val merces,
Que merces sera ses par;
Sol aisso m deu esglaiar;
Car re plus fag non agues
Mas las setmanas e 'ls mes
E 'ls ans qu' ai laissatz passar
Qu' ieu non fui de dieu membrans,
Sol aisso m deu esser dans,
Car guizardon no fai hom de non re,
E quier l' a tort qui non a fag de que.
Vers Ihesu Christz, no vos pes
Si de ren vos aus preiar;
Merces! no m laisses cobrar
Al diable que m tenc pres;
E s' anc fis ren que il plagues,
Al cors, o vendetz tot car,
Al cors qu' a faitz los enjans
En sia faitz lo demans:
Lo cors n' aia la pena que il cove,
Qu' el a trait vos e s' arma e se.
Ben sai qu' a tart me sui pres
Vas dieu de merce clamar;
Mas vos mi mandetz, so m par,
Que, qual ora qu' ieu vengues,
No m soanariatz ges,
E fora temps d' albergar;
Pero ben volgra enans
Laissar mos faillimens grans,
Qu' en vostra cort non pot intrar, so cre,
Nuills hom tachatz de nuilla laia re.
Segles desleials, truans,
Vils enseinhaires d' enjans,
Ab vos non a nuills hom honor ni be,
Pois ama dieu ni 'l tem ni 'l blan ni 'l cre.
Cadenet.
VI.
Verges, en bon' hora
Portes lo salvaire,
Que el vos honora
E us fai joya faire,
E 'l pobol que fora
Liuratz a maltraire
Vos pregues ahora,
Sancta, plazen maire,
Quar d' ira e d' esmay
E de tot esglay
Guardatz lo pus laire
Que vas vos s' atray.
Domna, doussa e bona,
Humil, de bon aire,
Ajuda e perdona
Ad aquest peccaire
Guarda ma persona
D' anta e de mal faire,
E m' arma razona
Ab lo tieu car paire,
Qu' els peccatz qu' ieu ay
Fatz ni ditz ni say
No m puescan mal faire,
Quan del segl' irai.
De gracia plena,
Avetz nom Maria,
Quar getatz de pena
Cui merce vos cria;
Liam ni cadena
No 'l te ni 'l tenria,
Pus qu' ab quarantena
Gen vos humilia;
Penedensa fai
Hom just e veray,
E per aital via
Va senes esmay.
Regina d' auteza
E de senhoria,
La vostra franqueza
A 'l mon en bailia;
De tota boneza
Etz roz' espandia,
Quar en vos s' es meza
Gracia floria;
Sel frug fon veray
Qu' intret ab lo ray
En vos, dona pia,
Quan l' angel venc sai.
Verges, en efansa
Nasquet lo dous Sire
De vos, ses duptansa,
De qu' ieu sui servire,
La sua pitansa
Mi fassa jauzire
Ab gran alegransa
Dels bes qu' ieu dezire,
Quar gran dezir ai
Qu' ieu fos el renc lai
Senes tot cossire,
On sanh Peir' estay.
Perdigon.
VII.
Dieus, vera vida, verays,
Dreitz entre clergues e lays,
E nomnatz salvaire Crist
En lati et en ebrays,
E natz e pueys mortz vius vist
Ressorzitz, don laisses trist
Selhs que pueys fezes jauzens.
Senher vers, ieu falhi fals
Dont es issitz tan grans mals
En cossir et en digz durs,
Et en fols faitz infernals
Ab brondilhs d' estranhs aturs,
Et en tans talans tafurs
Que m rend colpables penedens.
Per quant qu' ieu mescabes anc,
S' ieu non ai cor ferm e franc
De dir si cum agra ops,
Prec a vos a cui m' en planc,
Per cui tan fizels fon Jops,
Que non guardetz mos tortz trops,
Mas gracia m sia sufrens.
Qu' ieu non sui si savis sai
Que puesca conquerre lai
Lo regn' on nulh set ni fam
Ni caut ni freg non a mai,
S' il vostra vertutz cui clam
No m don esfortz qu' ieu dezam
Lo joy d' est segle giquens,
Que m fai falhir ves vos sol,
Per qu' el cor m' intra en tremol;
E si m servatz mos forfaitz
Tro lai al derrier tribol,
Qu' enans no 'ls m' aiatz far fraitz,
Senher, non er ges bos plaitz,
Si merces no us sobrevens.
Senher, qu' estorses Sidrac
D' ardr' en la flama e Midrac
Essems et Abdenago,
E Daniel dins del lac
On era ab lo leo,
E 'ls tres ricx reys contr' Hero,
Suzana dels fals guirens.
E pasques, senher sobras,
De dos peys e de cinc pas;
E 'l Lazer ressorzis vos
Qu' era ja quatredias,
Et ac per so gent respos
Lo sers sai centurios,
E traisses motz greus turmens.
E fezetz de l' aigua vi
En la cort d' Archetricli,
E d' autres miracles moutz
Don hom carnals no sap fi,
Ni no us en mostretz estoutz;
E parlet per vos lo voutz
De Luca, reys resplandens.
E creetz la terra e 'l tro
E tot quant es ni anc fo,
Lo sol e 'ls signes del cel;
E confondetz Farao,
E detz als fills d' Israel
Lach e bresca, manna e mel,
E dampnes ab serp serpens.
Als vostres fon requies,
Quan vos plac que Moyses
Yssia lai el dezert,
E 'l liuretz las mas e 'ls pes
Denan l' angel que respert;
E sant Peire fezes cert
De vostres digz plus crezens.
E vos queric lo durs plebs
Tro lai ont es mont Orebs,
D' Aurien en Bethleem;
Que vos enfugi Joseps
En Egypte, so sabem,
E pueys en Iheruzalem
Vengues als vostres parens.
De Nazareth reys Ihesus,
Pair' en tres personas us,
E filhs e sanhs esperitz,
Vos prec et unitatz sus
Qu' es cims e rams e razitz,
E dieus de tot quant es guitz,
Que m siatz, si us platz, defendens.
E sai obra ab bon talan
Mi detz a far entretan
Que quan venretz en las nius
Jutjar lo segl' el jorn gran,
Vers dieus, no m siatz esquius,
E que, clars reys, doutz e pius,
M' en an' ab grazitz jauzens.
Senher, no m' oblidetz ges,
Qu' ieu ses vos no sui sostens,
Vers dieus, pair' omnipotens,
Si cum vos etz conoyssens
Mi senh, el vostre nom crezens,
In nomine patris et filii et spiritus sancti, amens.
Pierre d' Auvergne.
VIII.
Ja hom pres ni dezeretatz
Non er de bons amics guarnitz;
E 'l manens, qu' es d' aver issitz,
Es clamatz folh e pauc prezatz;
E quant hom es desbaratatz,
Ditz hom qu' a perdut per non sen:
Et a hom greu per folh manen,
Ni home quan fort l' es ben pres;
E fora savis e cortes
Qui des tan bon cosselh denan
Cum fai quant hom a pres lo dan.
Vilas es et outracuiatz
Totz hom, quan si sent enrequitz,
Que s cuia qu' ab sos vilans digz,
Ab sobrieras et ab foudatz,
Li deya hom esser privatz,
Ni qu' om ja l' am de bon talen;
E sitot hom lo i fai parven
Per paor, aquo non es res;
Que quan hom lo troba en deisses,
Ab gaug et ab alegrier gran
Rizon tug, quant el vai ploran.
Ieu dic que ben es estraguatz
Hom rics ergulhos, descauzitz,
Que vol ades tener aunitz
Sos vezis ni apoderatz;
E deu ben esser aziratz,
E mal volgutz per tota gen;
Et es razos si mal l' en pren,
Que nos avem vist et apres,
Per un o per dos o per tres,
Que si son anat percassan,
Don tug devem esser membran.
Ben pot hom en autrui foudatz
Apenre que n' er plus complitz,
Plus honratz e plus obezitz,
E plus francs e plus ensenhatz;
E non pot esser fort senatz
Qui no s dona garda soven
Com l' us pueia l' autre dissen,
E qui non conquier, quan luecs es,
Amics, e quan los a conques,
Gart los, quar mais hi a d' afan
Qu' al conquerer, al mieu semblan.
C' aissi n' es lo setgle passatz
Que l' us es pros, l' autr' escarnitz,
L' us vilas, l' autre gen noiritz,
L' us mal apres, l' autr' ensenhatz
E de totz mals estars cargatz,
L' us vertadier e l' autre men;
Qu' el mon non a un tan valen
En cui tug bons aips sion mes,
For lo rei dels Aragones,
Quar en lui son tug ben sobran;
Ja non sabres demandar tan.
Rambaud de Vaqueiras.
IX.
Pus lo dous temps ve jogan e rizen,
Guais e floritz, joyos, de bel semblan,
Be 'l devem doncx aculhir en chantan,
Pus el no fai de joy tan bel prezen,
Quar gaugz nos es donatz per alegrar,
E qui no l' a, si 'l deu far aparer,
Que de conort movon gaug e plazer,
Don hom en pren ades son miehs a far.
Quar si fos bon so que sol esser gen
Et agrades so que fon benestan,
Ieu cre qu' el temps valgra, qu' es atretan
Cum anc se fes, segon mon escien;
Mas quecx apren so que degr' oblidar,
Et oblida so que degra saber,
E leva sus so que degra chazer,
E bayssa jos so que degra levar.
Tot aisso fan li ric desconoyssen,
Qu' an mes derrier so qu' anava denan,
Don e condug, joy e solatz e chan,
E cuion pretz aver tot per nien;
Mas per razo non o podon portar,
Quar anc hom pros no fo ses pro tener,
Ni fo anc hom valen senes valer,
Ni bos ses be, li larcx senes donar.
En aissi an atras tornat joven
E gaug e pretz e valor e boban,
Qu' el guay dompney qu' om tenia entrenan
An li pluzor volt en deschauzimen;
E pus amors ten vil so qu' es plus car,
Non pot a dreg leial nom retener,
Quar qui despen tot son pretz en un ser
Pueys de cent jorns no pot tan recobrar.
Qu' ieu vi d' amor lo gaug e l' us e 'l sen;
Coblas e motz, cordos, anel e guan,
Solian pagar los amadors un an;
Ar es perdut qui demanes non pren;
Mas sazos fon qu' el maior don d' amor
Voli' om mais esperar que tener,
Et eras sai qu' ab lo complit voler
Moro 'l dezir que solon domnas far.
Per so val mais d' amor so qu' om n' aten
Que 'l cochos don desavinen no fan,
Que 'l dan son bo e plazentier l' afan,
E 'l sospir dous e 'l maltrag eissamen;
Mas pueys qu' amors non pot plus luenh anar,
D' aqui en lai torna en non chaler,
E muda 'l cor e ven en dezesper,
E drutz repren so que sol dezirar.
Dieus sal Rodes, qu' el a senhor valen,
Larc e cortes, savi e gen parlan,
E de donar a trop mager talan
Que de tener non a selh que o pren,
Qu' ieu 'n sai lo ver e mielhs a cuy en par;
E dieus don li bona via tener
De ben en mielhs e de pretz en poder,
Qu' els adregz fagz d' amor puesc' heretar.
Vas Anduza vuelh mon chant enviar,
Quar talant ai de mon senhor vezer,
Quar creys meten de pretz e de poder,
E viu ab gaug e vol jauzens estar.
Senher Guirautz, re no sap melhurar
Lo plus sabens el vostre captener;
Quar gaug de cor e vida de plazer
A qui ab vos pot viure ni renhar.
Hugues Brunet.
X.
Lo pair' e 'l filh e 'l sant espirital
Entre totz tres, e vos verges Maria,
Nos gart, s' ilh platz, del mal fuec ifernal
E del turmen que no falh nueg ni dia,
E que fassam totz los sieus mandamens
Si que venguam joyos e resplandens
El sieu regne, aissi cum resplan l' alba.
Los archangels e 'ls angels atretal
E totz los sans don la cortz es complia
Preguon per nos del falhimen mortal
Qu' el nos perdon, lo filh reyna pia,
Selh que per nos sufric mort e turmen
E passio, so sabem veramen,
E de si eys nos fe clardat et alba.
Dieus, vostr' amor e 'l guaug celestial,
E la doussor de la vostra paria
Nos gui e ns guar, e nos que siam tal
Que capiam en vostra companhia,
E que vas vos no fassam falhimen,
Ans vos amem de bon cor leyalmen,
Si que su 'l cel nos mostretz la vostr' alba.
Selh que per nos det son sanc natural,
E se liuret, e se mes en baylia,
Et en la crotz fon levatz atretal
E clavellatz e coronatz d' espia
Nos don a far qu' al jorn del jutjamen
Los nostres tortz no 'l sian remembramen,
Ans ab gran gaug nos men' en la su' alba.
Belh' estela d' Orien, dieu vos sal.
Tug preguem dieu que nos don bon ostal
En paradis on es clars jorns et alba.
Bernard de Venzenac.
XI.
Mantas vetz sui enqueritz
En cort cossi vers no fatz,
Per qu' ieu vuelh si' apelatz,
E sia lurs lo chauzitz,
Chanso o vers aquest chan;
E respon als demandan
Qu' om non troba ni sap devezio,
Mas sol lo nom, entre vers e chanso.
Qu' ieu ai motz mascles auzitz
En chansonetas assatz,
E motz femenis pauzatz
En verses bos e grazitz;
E cortz sonetz e cochans
Ai ieu auzit en verses mans,
E chansos ai auzidas ab lonc so,
E 'ls motz d' amdos d' un gran, e 'l chan d' un to.
E s' ieu en sui desmentitz
Qu' aisso no sia vertatz,
No er hom per me blasmatz,
Si per dreg m' o contraditz;
Ans n' er sos sabers plus grans
Entr' els bos, e 'l mieus mermans,
Si d' aisso m pot venser segon razo;
Qu' ieu non ai ges tot lo sen Salamo.
Quar es de son loc partitz
Domneys, que ja fon prezatz,
Mi sui alques desviatz
D' amor, tan n' estauc marritz!
Qu' entr' amairitz et amans
S' es m' es us pales enjans,
Qu' enjanan cre l' us l' autre far son pro,
E no i guardon temps ni per que ni quo.
Qu' ieu vi, ans que fo faiditz,
Si fos per amor donatz
Us cordos, qu' adreg solatz
N' issia e ricx covitz;
Per que m par que dur dos tans
Us mes no fazia us ans,
Quan renhava domneys ses tracio;
Greu es qui ve com es e sap com fo.
E non es tan relenquitz,
Sitot mi sui dezamatz,
Qu' ieu no sia enamoratz
De tal qu' es sima e razitz
De pretz, tan qu' a me es dans;
Pus la valors e 'l semblans
Son assemblat en tan bella faisso
Qu' om no i pot neys pessar meliurazo.
Ai! belh cors cars, gen noiritz,
Adregz e gen faissonatz,
So qu' ie us vuelh dir devinatz;
Qu' ieu no sui ges tant arditz
Que us prec que m' ametz, abans
Vos clam merce merceyans.
Sufretz qu' ie us am e no us quier autre do,
E ges d' aquest no m devetz dir de no.
Vas Malespina vai chans
Al pro Guillem qu' es prezans,
Qu' elh aprenda de tu los motz e 'l so,
Qual que s vuelha per vers o per chanso.
Na Beatritz d' Est, l' enans
De vos mi platz, que s fai grans;
En vos lauzar s' en son pres tug li bo,
Per qu' ieu de vos dauri mon vers chanso.
Aimeri de Peguilain.
XII.
Nueg e jorn suy en pensamen
D' un joi mesclat ab marrimen;
E no sai a qual part m' aten,
Qu' aissi m' an partit egualmen
Mezura e Leujaria.
Mezura m ditz suau e gen
Que fassa mon afar ab sen;
E Leujaria la 'n desmen,
E m ditz, si trop sen hi aten,
Ja pros no serai dia.
Mezura m' a ensenhat tan
Qu' ieu m sai alques guardar de dan,
De fol e de datz et d' afan;
E sai ben cobrir mon talan
D' aisso qu' ieu plus volria.
Leujaria no m prez un guan,
S' ieu no fau so qu' el cor me man,
E tuelha e do, e l' aver s' an;
Quar qui plus n' a plus pren d' enjan,
Quan ven a la partia.
Mezura m fai soven laissar
De manh rir' e de trop jogar,
E me veda quan vuelh mal parlar;
E mantas ves, quan vuelh donar,
Ella m ditz que no sia.
Leujaria m tol mon pensar,
E m ditz que per trop castiar
Non dey ges mon talan laissar;
Quar, si tan fauc com poirai far,
Non er la colpa mia.
Mezura m ditz que non domney
Ni ja per domnas non folley,
Mas, s' amar vuelh, esguart ben quey;
Quar, si penre vuelh tot quan vey,
Tost m' en venra folhia.
Leujaria m mostr' autra ley,
Qu' abratz e percol e maney,
E fassa so qu' al cor m' estey;
Quar, si no fatz mas tot quan dey
Intre m' en la mongia.
Mezura m ditz: “No si' escas
Ni ja trop d' aver non amas,
Ni non dar ges tot so que as;
Quar si dava tot quan mi plas
Pueys de que serviria?”
Leujaria m' estai de las
E ditz me, e tira m pel nas:
“Amicx, ben leu deman morras;
E doncx pus seras mes el vas,
Avers pueys que t faria?”
Mezura m ditz suau e bas
Qu' ieu fassa mon afar en pas;
E Leujaria m ditz: “Que fas?
Fai ades aitan quan poiras,
Qu' el terminis s' enbria.”
Messatgiers, lo vers portaras,
N Eblon de Senhas, e il m diras
Garins Brus lo 'l envia.
Al partir lo m saludaras;
E diguas me, quan tornaras,
Quals dels cosselhs penria.
Garins le Brun.
XIII.
Oi! Maire, filla de dieu,
E dels angels regina,
Cui Marc et Luc et Matheu,
Chascus sains aclina,
Gardatz mi l' arm' e 'l cors mieu,
Flors de rosa ses spina,
Dieu preian
Que, non segon mon enjan,
M' an jugan;
Mas segon sa merce gran.
Qu' eu ai faig dels peccatz tan,
Per ma folla follensa,
Que, s' ieu vivia mil an
En aspra penedensa,
Tan fai los faillimenz gran
Qu' eu non agra guirensa,
S' ab merce
Dieus no m perdon e m rete,
Non per me,
Qu' eu non ai faig lo per que.
Qu' eu sui fals e mensongiers,
Enveios e raubaire,
Et ab las autrui moillers
Faillir non doptei gaire,
E cobes e mal parliers
Fu e fins galiaire,
Et engres,
S' ieu trobes cui enjanes,
Per qu' ades
Per tot aital mi confes.
E non ai per me poder
De garir ni baillia,
Per que us veing merce querer,
Gloriosa Maria,
Que mi deignes tant valer
Qu' eu per vos gardatz sia
De tot mal
En aquest segle venal,
Desleial,
E m dones gaug eternal.
Si com dieus fon de vos natz
E 'n recep carn humana,
E il vostra virginitatz
Remas entier' e sana,
Tot aissi m gardatz, si us platz,
D' agaiz de mort subitana;
Desplazenz,
Cre qu' eu sia veramenz
Penedenz
De trastotz mos faillimenz.
Lanfranc Cigala.
XIV.
Un decret fauc drechurier,
E dic, si clergues layc fier,
Que fieira lo colp primier,
Pus l' apostolis o dis,
E 'l laicx feira per entier
Lo segon colp e 'l derrier,
E pueys sia 'n patz e fis.
Pus no m fauc autre jornal,
Farai una decretal
Que qui a moller venal
Que la lays a sos vezis;
E, si la torna en l' ostal,
Que l' enfant sion leyal,
Pus elh los pays e 'ls vestis.
Clercia no valc anc tan
Qu' els solo anar prezican,
Aras van peiras lansan
A l' autra gen,
E tenon per publican
Selh qui s defen.
Cavaliers solon raubar;
Ar an melhurat lur afar
De mentir e de perjurar;
E so que solion manjar
Porton vestit.
Dompneys es melhuratz mot fort
Que sol dar ad home la mort,
Ans que n' agues juec ni deport,
Ni fos volgutz;
Aras, ab que deniers aport,
Sempre er drutz.
Vilas no solon aver sen
Mas de laorar solamen;
Aras son vezat e saben,
S' an plen la pelh,
Et a plag, avan sagramen,
Qu' eron libelh.
Pierre Cardinal.
XV.
Vera vergena Maria,
Vera vida, vera fes,
Vera vertatz, vera via,
Vera vertutz, vera res,
Vera maire, ver' amia,
Ver' amors, vera merces,
Per ta vera merce sia
Qu' estenda en me tos heres.
De patz, si t plai, dona, traita
Qu' ab ton filh me sia faita.
Tu restauriest la follia
Don Adam fon sobrepres;
Tu yest l' estela que guia
Los passans d' aquest paes,
E tu yest l' alba del dia
Don lo dieus filhs solelhs es,
Qu' el calfa e clarifia,
Verais de dreitura ples.
De patz, si t plai, dona, traita
Qu' ab ton filh nos sia faita.
Tu fust nada de Suria
Gentils e paura d' arnes,
Umils e pura e pia
E fatz, en dis et en pes,
Faita per tal maestria
Ses totz mals, mas ab totz bes,
Tant fust de doussa paria
Per que dieus en tu se mes.
De patz, dona, si t platz, traita
Qu' ab ton filh nos sia faita.
Aquel qui en te se fia
Ja no 'l cal autre defes,
Que, si tot lo mon peria,
Aquel non penria ges,
Car als tieus precx s' umilia
L' auzismes, a cuy que pes,
E 'l tieu filhs non contraria
Ton voler neguna ves.
De patz, dona, si t platz, traita
Qu' ab ton filh nos sia faita.
David en la prophetia
Dis, en un salme que fes,
Qu' al destre de dieu sezia,
Del rey en la ley promes,
Una reyna qu' avia
Vestirs de var e d' aurfres;
Tu yest elha, ses falhia,
Non o pot vedar plaides.
De patz, dona, si t platz, traita
Qu' ab ton filh nos sia faita.
Pierre Cardinal.
XVI.
Dels quatre caps que a la cros
Ten l' us sus ves lo firmamen,
L' autre ves abis qu' es dejos
E l' autre ten ves Orien
E l' autre ten ves Occiden,
E per aital entresenha
Que Crist o a tot en poder.
La crotz es lo dreg gofainos
Del rey cui tot quant es apen,
Qu' om deu seguir totas sazos,
Las soas voluntatz fazen;
Quar qui mais y fai, mais y pren;
E totz hom qu' ab lui se tenha
Segurs es de bon luec aver.
Cristz mori en la crotz per nos
E destruis nostra mort moren,
Et en crotz venquet l' orgulhos
El linh on venia la gen;
Et en crotz obret salvamen,
Et en crotz renhet e renha,
Et en crotz nos volc rezemer.
Aquest faitz fo meravilhos
Qu' el linh, on mortz pres naissemen,
Nos nasquet vida e perdos,
E repaus en luec de turmen:
En crotz pot trobar veramen
Totz hom, que querre l' i denha,
Lo frug de l' albre de saber.
Ad aquest frug sem totz somos
Qu' el culham amorozamen;
Qu' el frug es tan belhs e tan bos
Que, qui 'l culhira ben ni gen,
Totz temps aura vida viven;
Per qu' om del culhir no s fenha,
Mentre qu' en a luec e lezer.
Lo dous frug cuelh qui la crotz pren
E sec Crist vas on que tenha,
Que Cristz es lo frugz de saber.
Pierre Cardinal.
XVII.
Ihesum Crist, nostre Salvaire,
Per salvar nasquet de maire,
Salut fes e mandet faire,
Car sel que la fai l' aten.
Aiso es gran cortezia,
Qui salva que salvat sia;
Qui autre a salut guia
Venir deu a salvamen.
So es qui la gen marrida
Viest e pays e los ajuda,
Sel jorn lur salva la vida
E de la mort los defen.
Car qui so non lur faria,
Fams e freg e malautia
E dolor los aussiria,
En aissi nostre vezen.
Mas sel que ben o vol faire,
Can lor ve la pena traire,
Salva los et es salvaire,
Segon lo mieu essien.
Per que hom que salut vuelha,
De salut faire no s tuelha;
E cora que salut cuelha,
Semen la primieiramen.
Car qui vol cuillir avena
Primieiramen la semena,
E qui semena en pena
Aquel cuelh en jauzimen.
Aus tu que amas l' anona
E deziras la corona?
Qui so que ama non dona,
So que desira non pren.
Aus tu que as draps e pelhas,
E vezes de freg vermelhas
Las gens, e claus tas aurelhas
A lur votz, cant van queren?
Tu quiers a dieu mantas causas;
Fols iest, car parlar li n' auzas;
Dieus a sas aurelhas clauzas
A ta votz, que no t' enten.
Aiso es mezura granda,
Qui no fai so que dieus manda
L' enemix l' a en sa landa,
L' arma metra en turmen.
De sens nos demanda tot dia
Can los paures nos envia;
E dis que qui lur daria
Demandes seguramen.
Ja negus hom que dieu creza
Non amassara rigueza,
Que ill pietatz e ill grineza
Li fay despendre l' argen.
No us pessetz qu' en una plassa
Merces ab gran aver jassa,
Que l' avers la merce cassa
E 'l merces l' aver despen.
Merces es cauza tan larga
Que de be faire no s targa,
Aver e peccat descarga
A son don cominalmen.
Merces vol, e dieus o manda,
Que hom son aver espanda
Lai on es nessieira granda,
E dieus ren en per un cen.
Dieus comanda c' om entenda
Sos comans, e qu' els aprenda;
E c' om sos vezis reprenda,
Can n' aura conoissimen.
Mas sel que lauza folia
E no blasma ni castia
Malvatz faitz, ni los desfia,
Pecc' ab doble falhimen.
Per que cascus en sa vida
De l' obra que l' es cobida,
Mentre que 'l clartat lo guida,
Deuria obrar lialmen.
Car qui fai delial obra,
Segon c' a servit o cobra,
E croy guizardo li sobra,
E 'n tray pena e turmen.
Aus tu que cantas las messas
E fas a dieu tas promessas?
Si no so sanas tas pessas,
Obras a ton dampnamen.
Sel que fai lo sagrifizi
No s tanh que s pes nuil mal vizi,
Ni qu' en aquel panh s' afizi,
Mas sol el sant sagramen.
Aus tu que as las grans terras
E per pus fas plag e guerras?
Del tort don manjas ni ferras
Rendras comt' al jutjamen.
Pueys que dieus t' a dat ton vieure
E que cobeitat t' enieure,
Dregz es c' al turmen te lieure
E que t tola 'l remanen.
Aus tu que tens las bailias
E que fas las simonias?
S' enans la mort no t castias,
Pueys no y as conseguimen.
Car si ab enjan baileyas,
Ab erguelh et ab enveyas,
Vas yfern cre que sopleyas,
Car fas l' obra falsamen.
Aus tu que te fas legista
E tols l' autruy dreg a vista?
Al partir n' er t' arma trista,
S' as mal jutjada la gen.
Tu que dizes que dreg sabes,
E per cobeitat t' entra bes,
Vas yfern cre qu' en sotz sabl' es
Plus c' om que dreg non enten.
Aus tu que gleyza governas
E cobeitas e campernas
L' autruy dreg? del tort t' infernas,
Si caritat no t defen.
Car si a tort escumenjas,
De tu meteis cre que t venjas,
Que no s tanh las gens destrenjas
Mas tant c' a razon cossen.
Mas sel sec via segura
Qu' en totz sos fatz met mezura,
Car caritatz e drechura
Lo conduc a salvamen.
Aus tu que donas mezinas
E que jutjas las orinas?
Si tas obras no so finas,
A tort galias la gen.
Tu que sabes de fezica,
E no t prezas una fica,
Qu' el ben e lo mal te gica,
Tal fals obra t sobrepren.
Aus tu qu' en orde t' apaissas
E sojornas e t' engraissas?
Pertz te, si ta regla laissas,
Ni fas fol captenemen.
Pus c' a dieu son vot non tenes
E qu' en tos fatz lo malmenes,
Dreitz es c' a la mort o penes,
Sitot estas en coven.
Aus tu que fas compras e vendas,
Falsa caresma e calendas,
Tan qu' en aquel fag entendas?
T' arma engana s e s ven.
Pus que tos vezis enganas
Ab fals pes, ab falsas canas,
Dieus te met ab las soanas
Com fals deniers c' om no pren.
Aus tu que dizes lauzenjas
E que de mal dir desrenjas?
Fols yest, si las gens blanstenjas
Sinon per castiamen.
Car si de mal dir t' esforsas,
Fas que fols, si be t deportas,
Que no s tanh las jens remordas,
Car peccas y mortalmen.
Aus tu que trop voles beure
E la nueg te colgas ieure
Tro 'l dema? non es desueure
Que as begut eyssamen.
E cant as ta test' armada
De vil cor, e l' a levada,
Mot yest en sola balada
Qu' escarmisson t' en la jen.
Aus tu que trop te enfrunas
De manjar, e pauc enduras?
Si 'n est segle no dejunas,
L' autre t deu far espaven.
Car qui en manjar non met tenpre
E fai son dieu de son ventre,
Dreg es que dieus deseguentre
Lo laisse al jutjamen.
Aus tu que toles ni enblas?
Las! com de paor non trenblas!
Can prens l' autruy que non rendas,
Mot as malvat ardimen.
Erguel y fas e sobreyra
E t' arma sec avol feyra,
E 'l cors, si es qui l' engueyra,
Pot n' esser pendut al ven.
Tu qu' en adulter' intendes
E garas que no t' esmendes,
Pel delieg c' al cors cossentes
Seras punitz malamen.
Pus qu' en peccat te delieitas,
E ton criator despeytas,
Auias qual loguier en penras:
Dolor, pena e turmen.
Aus tu que obras ab uzura
E metz dieu a no t' en cura?
So que la gen paubr' endura
Manjas e beves soven.
Sabes doncx, pus l' autruy brost as
Ab gran tort, ab paucas sostas,
Un jorn ve que so qu' ajostas
Ira tot cominalmen.
Aquel jorn deu far fereza
A sels que an cobezeza,
Que moble d' un' egaleza
Auran li paubr' e 'l manen.
Aquel jorn es de cossire,
Car dieu trac per nos martire,
E 'l jorn que mort, al ver dire,
Abduy porton espaven.
E si d' aquetz dos membrava
Ad home, e pueys peccava,
Malvestat vey qu' el sostcava,
Et es del tot negligen.
Aus tu que as ren destruchas
Las monedas que trabuchas?
Per un deniers que n' estuchas
En tols X. a l' autra gen.
Si tot ho fas a presensa,
E no prenes penedensa
Tu cairas en la centensa
De dieu pair' omnipoten.
No m par c' aia de dieu cura
Ni c' ame dieu ni drechura
Qui franch la leial mezura,
E la malvaiza concen.
Aus tu que yest laoraires
E que yest malvais bolaires?
Plus lag falhes c' autre laires,
Si mens terras ni renden.
Car si l' autruy dreg cobeitas
E 'n giques las vias dreitas,
Sabes qual loguier enpleitas?
Mort que t penra soptamen.
Aus tu que tos jornals loias
E pueis de l' obrar t' enoias?
Dels morts cre que t' apropias,
S' as falsat ton covinen.
Pos quecx, segon sa manieira,
Deu far obra drechurieira,
E, si sec aital carreira,
Pot vieure mot leialmen.
Estay donc en penedensa,
Et aias ferma crezensa,
E non cobeitar gran sensa
Ni 'l ben d' aquest mon dolen.
Car tot cant es ni ja sia
Aur, aver e manentia
No val res ses la paria
Del paire omnipoten.
Doncx pos las vanitatz vezes
D' aquest mon, per que non crezes
Aquel que fo mortz e prezes
Per nostre desliuramen?
Qu' el te mostra doas vias,
E potz chauzir, se vezias;
E si la meillor non trias,
Ta clartatz no t val nien.
Doncx ben yest fols, si non gardas,
Cant t' apatiscas ni t lardas
Que tu mezeuses non tardas
Ni t metas en fuec arden.
Tu qu' els deleitz del mon voles
Homs o femnas, ren no t doles;
De tos tortz, cor que trascoles,
Auras ir' e marrimen.
Pensat doncx, cant ti sojornas,
Don moguis ni en que tornas,
Car sobremal t' arm' enfornas
En trebaill et en tormen.
Mas cobreras, si t castias,
Sol dezesperatz no t sias,
Que dieus ti vol, si 'l volias,
Et as molt bon partimen.
Pos que tal patz podes faire,
Que atendes doncx, peccaire,
Que 'l mortz no t sostera gaire,
Ans te penra sopdanamen.
Estai doncx en penedensa
Et aias ferma credensa,
E reten en sovinensa
Sel que t formet de nien.
Dieus te fes a sa semblansa,
Membre t doncx la crox e 'l lansa
E 'l trebaill e ill malanansa
Qu' el trais pel tieu garimen.
Las! ben mot ti pot retraire
Lo senhers qu' es caps e paire
Que dels tieus tortz fo penaire
E soffri mort e turmen.
Pensat doncx en ton coratge,
Mentre que yest el passatge,
Pos per te met tan car gatge,
Que segas son mandamen.
Dieus non vol sias toleire,
E vol cregas ton preveire
Qu' els bens que t mostra deves creire
Senes tot corrumpamen.
Aia s merce e largueza,
E renha ab leialeza,
E gurp tort et avareza
E tot fals perpauzamen.
Et enpres, s' en aissi renhas
Ni tant en tos fais t' estrenhas,
Segurs siest c' a la mort veinhas
Vas Ihesu Crist qui t' aten.
Preguem doncx qui ns apana
E pres per nos carn humana,
Que ns don far via sertana
Com tengam ves lui breumen.
E preguem sa doussa maire
Que ns enseigne e ns esclaire
Ab son filh et ab son paire
Tan per qu' en siam jauzen.
E tug digam en Amen
Gratias al seinhor valen,
Que el nos gart del tormen
D' enfern orrible e puden.
Amen.
Pierre Cardinal.
XVIII.
Ben es adreigz
E sap qu' es alegranza,
Et esser pros
E tot lo meil chauzir,
Cel cui respeigz
D' enteira benananza:
Reten joios,
E sol per deu servir;
Los vains deleigz
E las vanas legors
Del segle fals
Relenquis et ublida,
Qu' aissi s conquer
Viure qu' es mieillz de vida.
Qu' en alegrier
A tot jorn mais s' afina,
Sol esperan
Lo joi perpetual,
E 'l dezirier
Del joi a per mezina
Contra l' afan,
E 'l destric temporal,
Si que leuzer
Li semblon li plus greu,
Et a sa fi
Vai l' arm' en vid' eterna;
Per qu' es fols quecs
Qu' en tal joi no s governa.
Sitot estreigz
Sembla l' encomenzanza,
Pueis saboros
Es tan l' estern segur,
Qu' estiers destreigz
Et a greu ses pezanza;
Es sofrachos
Chascuns de joi jauzir,
Qu' el plus eleigz
Jois mondans es dolors
Tan desleials
Com hom, plus l' a complida,
Tan mais s' arm' er
Aprop sa mort marida.
Doncs laig sentier
Sec cel q' ab leis camina,
E qui penzan
Non vailh vid' eternal
E 'l gaug sobrier
Qu' a cel q' a deu s' aclina,
E com pezan
Son turment enfernal,
E com cel qui er
Visquet mor hui de leu,
Car dreigz aissi
Vol que chascuns deterna
Com hom es cecs,
Pueis fai don s' arm' enferna.
Per qu' eu, cui dregz
Non pot cobrar pidanza,
Prec l' aut pidos
Qui vol per nos morir
Qu' el mieus neleigz
No ill faza far venianza,
E que cochos
Faza m si obezir
Qu' el chauz e 'l freigz
Qu' atrai aitals folors
M' er estiers sals,
Tan fort m' es abelida
L' artz qu' a l' enfern
L' arma capdel e guida.
Mas si be mir er
L' enfernal desiplina
Per laid enjan
E per faire maint mal
Socors entier
M' en faiz, verges regina,
Don conort an
Maint cui razos desval,
Quar des tot pier,
Si deus non fai en breu
Perdon tan fi,
Qu' oimais plus no m' esquerna
Fals jois ni decs
Don moiren sempiterna.
Don vos requier,
Domna, q' en preiatz deu
Qu' ieu sec ma fi
E no y trueb vid' eterna,
Si vostre precs
No m n' es lums e lanterna.
Barthélemi Zorgi.
XIX.
Sirvens suy avutz et arlotz,
E comtarai totz mos mestiers,
E portacarn e galiotz
E rofian e balestiers
E prestaires et escudiers,
E say ben de peira murar;
Pero de cozir non truep par;
E manta portey mantas ves;
Et ai mais de mil auzels pres;
E suy joglar dels avinens,
E de VII. ordes suy crezens.
E fuy mazeliers e fis datz,
E corregiers fuy lonjamens,
E say far anels belhs e gens
E rateiras per penre ratz,
E far ausbercx e gonios,
E sai far putas e lairos
E semnar blatz, e fuy boviers,
E mais d' un mes mercadaniers,
E sai far arcas e vaysselhs,
Penches e fus e cascavelhs;
E sai far guabias e naus,
Cotelhs et espazas e faus;
E sai esser pestres e cocx,
E sai metre geys, quant es locx.
E suy clergues e cavalliers
Et escrivas e taverniers,
E sai far cellas et escutz,
E sei penher e faire glutz,
E sai teisser e far carbo,
E sai ben far de galh capo,
E sai far teules e capelhs,
E sai far jupas e jupelhs,
E sai far lansas e bordos,
E suy espessiers trop bos,
E sai batre lana e deniers,
E suy trop cortes agulliers,
E suy cambiaires leyals,
E suy enves las femnas fals.
E fis estueyras e tamis,
E serquiey aur e pueys m' assis
A cavar argen per tres ans,
E fuy corrieus arditz e grans;
E sai far fres et esperos,
E budelliers suy a sazos,
E fis caus e fuy campaniers,
E sai ben esser falconiers,
E fuy portiers e baru faut
E guacha per freg e per caut,
E billaires e berretiers,
E fuy de seda bos obriers,
Et engienhs fi, si dieus me gar,
E cordas e pairols sai far.
Encar n' ay avutz de plus belhs,
Qu' ieu gardiey fedas e anhels
E fuy crestaire de porcelhs,
E tenh fil de mantas colors,
E toquiey azes e saumiers,
E fuy may de dos mes porquiers,
E fuy penchenayre de li,
E guardiey may d' un an moli,
E fuy manescalc de cavalhs
E guardiey eguas per las valhs,
E fabres e pelleciers
E ballestiers e sabatiers,
Qui m' en vol creyre, bos fols suy
E savis be, quan truep ab cuy.
Raimond d' Avignon.
XX.
Domna, dels angels regina,
Esperansa dels crezens,
Segon que m' aonda mos sens
Chan de vos lenga romana;
Quar nuls hom just ni peccaire
De vos lauzar no s deu traire,
Can sos sens miels l' aparelha
Romans o lenga latina.
Domna, roza ses espina,
Sobre totas flor' s olens,
Verga seca frug fazens,
Terra que ses labor grana,
Estela del solelh maire,
Noirissa del nostre paire,
El mon una no us somelha
Ni londana ni vezina.
Domna joves e mesquina,
Fost a dieu obediens
En totz sos comandamens;
Per que la gen crestiana
Cre ver e sap tot l' afaire
Que us dis l' angel saludaire,
Que consebras per l' aurelha
Dieu que enfantes vergina.
Domna, verges pura e fina
Ans que fos l' enfantamens
Et apres tot eissamens,
De vos trais sa carn humana
Jhesu Crist nostre salvaire;
Si com, ses frachura faire,
Vai e ven rais quan solelha
Per la fenestra vezina.
Domna, vos etz l' aiglentina
Que trobet vert Moysens,
Entre las flamas ardens;
E la toizos de la lana
Que s moillet en la sec' aire,
Don fo Gedeons proaire;
Mas natura s meravelha
Com romazest enterina.
Domna, estela marina,
De las autras plus luzens,
La mars nos combat e 'l vens;
Mostra nos via certana:
Quar si ns vols a bon port traire
No tem nau ni 'l governaire,
Ni 'l tempier que ns estorbilla
Ni 'l stobi de la marina.
Domna, metges e metzina,
Lectoaris et enguens,
Nos nafratz de mort temens
La velia oing e sana;
Dossa, pia, de bon aire
Fai nos tost de mal estraire,
Quar perdutz es qui s fonilla,
Pos la mortz l' es trop aizina.
Dieu espoza, filh' e maire,
Manda 'l filh e prega 'l paire,
Ab l' espos parl' e conselha
Com merces nos si' aizina.
Pos durmen mas tu ns revelha
Ans que ns sia mortz vezina.
Pierre de Corbiac.
XXI.
Be volria de la mellor
De totas far chanso plazen,
Quar d' autra chantar non enten
Mas de la verge de doussor;
Qu' estiers non puesc mielhs mos bons motz despendre
Qu' en la doussa dona de paradis,
On dieus pauset totz los bes e 'ls assis,
Per qu' ieu li prec que 'l plassa mon chant prendre.
Aitan ses plus viu ad honor
Totz hom, quant ama coralmen
Aquesta dona d' onramen,
E met son temps en sa lauzor;
Quar ela 'n pot mout bon guizardon rendre
Que non es joys, plazer, solatz ni ris
Que non agues totz hom que la servis
E qu' en s' amor totz temps volgues entendre.
S' om pogues partir de follor
E de malvais entendemen
Son cor, e servis leyalmen
La mayre de nostre senhor,
E no volgues dieus tan soven offendre
Ni ves lo mon tan fort estar aclis,
Ja fals' amor non l' agr' aissi conquis
Que 'l fezes tan sos avols dons atendre.
Nulhs hom no val ni a valor,
Si non lauza la plus valen,
La mayre de dieu doussamen,
Per cui si salvon peccador;
Quar en lieys son totz bos ayps ses contendre,
La mieller es que anc fos ni hom vis;
Tan fon lo pretz dels sieus bes ricx e fis,
Per que dieus volc en lieys per nos dessendre!
Mout hi fes gran a nos amor
Dieus, quan venc en lieys humilmen
Per delir nostre fallimen,
E per portar nostra dolor,
E s' en laysset als sieus trahir e vendre,
Et ab sa mort la nostra mort aucis:
Mortz eravam tug, si dieus no muris,
Per qu' a luy plac son cors en crotz estendre.
Bernard d' Auriac.
XXII.
Cor ai e voluntat
Que fes us precx prezatz,
S' ieu ben far lo sabia;
E volgra m fos donatz
Sens e sabers assatz,
Sels qu' als precx convenria.
Dona sancta Maria,
Preyatz Ihesus, si us platz,
Cui es Cristz apellatz
E de paradis via,
Qu' ampar l' anima mia,
Si cum plazer li sia;
Que m perdon mos peccatz
Qu' ai pessan cogitatz
E ditz per ma folia,
Sels qu' ai obrat man dia,
Aissi quo non devia,
Don soi mot encolpatz;
Dona de dignetatz,
Vos m' en faitz guerentia.
Enquer prec que m vallatz,
Dona, e que m sofratz,
Qu' ieu vos laus tota via;
Pero crey qu' es vertatz
Que, si 'l sen dels prelatz
E 'l saber de clercia
Hom ajustar podia,
Et ieu poder avia
Qu' en mi fosson justatz,
Non seria bastatz
Ni 'l mile non auria
Del saber qu' obs m' auria
Al laus qu' ieu dir volria;
Dona, 'ls bes que son datz
En vos qu' enlumenatz
Tot lo mon que s perdia,
Per vos se salva e s guia;
Per qu' ieu dic ses fadia
Per vos son restauratz,
Dona, 'ls que son salvatz;
Aidatz me, qu' ieu sals sia.
Qu' ieu crey, si vos m' aidatz
Ni mos precx escoutatz,
Tant etz de dieu amia,
Leu sera acabatz
Mos precx et yssaussatz
Mielhs que no m tanheria,
Segon que ieu fallia
El temps que mal vivia;
Pero sui m' en laissatz,
Don prec merce m' aiatz,
Qu' estiers non puiaria
A la gran companhia
On es tot' alegria
De dieu qu' es trinitatz;
Ni veyria sa fatz,
Si merce no m valia.
O! maire de dieu pia,
No truep en vos fadia,
Sivals aitan m' aidatz
Quan que sia passatz,
Qu' ieu pres dels sanys estia.
Le frère mineur, moine de Foissar.
XXIII.
Luecx es qu' om si deu alegrar;
E sitot no m suy amaire,
Si vuelh ieu esser chantaire
Et en luec mon saber mostrar:
Qu' ieu dic que paucx ni grans avers
No val saber, qui l' avia;
Per que d' apenre quecx dia
Creys als plus savis lor volers.
Quascus deu entendre en plazers,
Gardan se de vilania;
E deu faire quascun dia
De be segon qu' es sos poders:
Pero, si s vol desmezurar,
Sos pretz no pot durar gaire,
Quar mezura essenh' a faire
So per que bos pretz pot durar.
Qui gran cor a de larguejar
Saber deu dont o pot traire;
Non dic qu' hom si deia estraire
De valer, ni no s tanh a far.
Grans afans es lo conquerers,
Mas gardar es maestria;
E qui pert per sa follia
No sap quals afans es querers.
Ses mezura sens ni sabers
No val ni grans manentia;
Pero luecx es que seria
Dans trop gardars e reteners:
Luecx es qu' hom deu outrapassar,
Luecx de calar, luecx de braire,
Luecx de donar, luecx d' estraire,
Luecx de sen, luecx de folleiar.
Qui son bon pretz vol tener car
No sia fols ni gabaire,
Quar fols es qui vol retraire
So que sap que fay a celar;
E fols qui vol dir totz sos vers,
E fols qui en fol se fia,
Fols qui falh e no s castia,
E fols qui sec totz sos volers.
Pons Fabre d' Uzes.
XXIV.
Esperansa de totz ferms esperans
Flums de plazers, fons de vera merce,
Cambra de dieu, ort don naysso tug be,
Repaus ses fi, capdels d' orfes enfans,
Cossolansa dels fis descossolatz,
Frugz d' entier joy, seguransa de patz,
Portz ses peril, porta de salvan port,
Gaug ses tristor, flors de vida ses mort,
Maire de dieu, dona, del fermamen,
Sojorn d' amicx, fis delietz ses turmen,
De paradis lums e clardatz et alba.
Gloriosa, tant es la joya grans
Que us venc de selh qu' el mon capdelha e te,
Que vos lauzan no pot hom dir mas be,
Si tot lo mons n' era tos temps lauzans,
Quar en vos son totas plazens bontatz,
Gaugz et honors, salutz e caritatz,
Verdier d' amor, qu' el tieu pressios ort
Dissendet frugz que destruys nostra mort,
Verga seca fazen frug ses semen,
Porta del cel, via de salvamen,
De totz fizels lums e clardatz et alba.
Plazens dompna, qu' en vos a plazers tans
Que tot lo mons non diria 'l mile;
Gloriosa, pus que tant as de be,
Membre t de me e de totz tos clamans;
Qu' el tieus gens cors fon per nostr' ops creatz.
Cors gracios, ples de totas beutatz,
Pus que ses te non puesc trobar cofort,
Perduy me lay on es vida ses mort,
Pres del tieu filh que m' a fach de nien,
Si qu' ieu veya 'l sieu gay captenemen
Lay on no falh jorns ni clardatz ni alba.
A! quon seran jauzens e benanans
Tug vostr' amic d' entier joy per jasse;
E pus dieus vol qu' en vos sion tug be,
Gloriosa, siatz de mi membrans;
E sitot s' es grans vostra sanctitatz,
No m' oblidetz, dompna, per mos peccatz;
Qu' ayssi quon son mey falhimen pus fort
M' es maiers ops que m desliuretz de mort;
E quar de vos auta merce n' aten,
Merce m' aiatz per vostre chauzimen
Que me siatz lums e clardatz et alba.
Qu' ieu falhitz, fals, mi sent greus e pezans
Per mos fols faitz et ai razon de que,
Quar grans so 'ls mals qu' ai faitz e pauc li be,
E 'lh dic tafur, per qu' ieu suy merceyans
Que m razonetz, plazens dompna, si us platz,
Lay on seran dregz jutjamens donatz,
Que no y valran plag ni agur ni sort,
Ans aura quecx per se paor de mort;
Vos me mostratz al jorn del jutjamen
Vostre car filh, ab cara resplanden,
Que m don ab joy lum e clardat et alba.
Poderos dieus, verays e merceyans,
Merce m' aiatz, qu' ieu vos azor e us cre,
E us ren lauzor de l' honor e del be,
Que m' avetz fag temps e jorns, mes et ans.
Dieus paire, filhs salvaire, Crist nomnatz,
Sayns esperitz, e vera trinitatz,
Als peccadors donatz via e conort,
Que s desliuron dels liams de la mort,
E 'ls faitz venir al veray jauzimen
On seran faitz maynt glorios prezen
Lay on estan jorns e clardatz et alba.
Lo sons es tal, que tenh la folla gen;
Lev si qui dorm mentre qu' a merce pren
Dieus peccadors, qu' el jorns ven apres l' alba.
Vida don dieus ab joy ses marrimen
En paradis, ab tot lo sieu coven,
A totz ayssels que diran aquest' alba.
Guillaume d' Autpol.
Fin du tome quatrième.
