Guillaume Adhemar.
Ben fora oimais sazos e locs
Que m' aizines d' un vers pessan,
Qu' hom lo retraisses en chantan,
Tal per que m fos digz us vers ocs
Per sella qu' el mon plus dezire;
Don desiran m' er a languir,
S'en breu no li 'n pren chauzimens.
E fara m canezir a flocs,
Si no m socor abans d' un an,
Quar ja m dizon que m van brulhan
Canetas, e no m sembla jocs;
E si m fai jove canezir,
Tot canut m' aura, quan que tir,
Quar bos esfortz malastre vens.
Que, s' ieu vivia tan cum Enocs,
Ges ieu non tenria ad afan
A lieys servir de bon talan;
Qu'on maiers es, plus calfa 'l focs;
Atressi hieu, on mais n' albir
E me, trop plus fort en cossir
De far e de dir sos talens.
Aissi cum dels escacs lo rocs
Val mais que l' autre joc no fan,
E fis maracde, que resplan,
Val mais que veires vertz ni grocs,
Aissi val mais, qui que s n' adir,
D' autras mi dons per enrequir
Son pretz ab rics captenemens.
Per qu' ieu volria esser mais cocs
De sa cozina, lieys gardan,
Qu' aver l' onor d' un amiran
Ses sa vista, fos mieus Marrocs!
Quar non es hom qui la remir
De bon cor, ja 'l puesca venir,
Lo jorn, mal ni destorbamens.
Per que t precs, messatgiers, que brocs
Tan quan poiras ton alferan,
E dic t' o plus que per ton dan
Pel mieu destric, que no t derocs;
Que eu tan tem lo tieu delir,
Qu'en autra sazo del murir
Non seria ges tan dolens.
E guarda no 'l sembles badocs
Dels salutz ni de l' al que 'l man;
Qu' ieu te pliu, si t'en vas cambjan,
Qu'ab l' un estreup t'auria ops crocs;
E di li m qu' ieu non puesc guerir,
Si m fai tremolar e fremir,
Ses lieys, ma voluntatz valens.
Et En Capairo potz plevir
Que Guillems Adhemars fai dir
Que si donz val d' autras V cens.
E diras li m mais al partir,
Qu'aissi m son fresc mei lonc dezir,
Que m sembla qu' ades s' acomens.
