Tenson de Guillaume Rainols et de Guillaume Magret.

Tenson de Guillaume Rainols et de Guillaume Magret.

Magret, puiat m' es el cap

So qu' inz el ventre no m cap;

Bons es per listr' e per drap,

Mas qui be us quier ni us esterna

Trobar vos pot, si no us sap,

Pres del vaissel ab l' enap,

Qu'ades tendetz vostre trap

Lai on sintetz la taverna.

Guillems Ranols, a mescap

Metrai mos motz qu' ieu arap

De tal loc, e trop non gap,

On non voill lum ni lanterna;

E s' ieu a vilans escap

Si que neguns no m' atrap,

Don tenc lor parlar per gap,

En talant ai que us esquerna.

A penas i trop que i lim

Merce d' En Bernart Razim,

Magret, que us ten sec e prim

En estiu, e quant iverna;

E us ai vist un tal noirim,

Los vairons qu' avetz el cim,

Que us fan plus lag de Caym,

E us reverson la luzerna.

Guillems, de la claustra us vim

Issir enceint ab un vim;

E s' ieu de vos no m' escrim

Non voill mais beure a Maerna,

Qu'anc, pois nos enjoglarim,

Vos n' ieu non sai auzim

Tan bos motz ni que meils rim

Com vos don l' arma s' enferna...

Tenson de Lanfranc Cigala et de la Dame Guillelma de Rosers.

Tenson de Lanfranc Cigala et de la Dame Guillelma de Rosers.

Na Guillelma, man cavalier arratge

Anan de nueig, per mal temps que fasia,

Si plagnian d' alberc en lor lengatge,

Auziron dui bar que, per drudaria,

S'en anavan vas lur domnas non len.

L' us s' en tornet per servir cella gen,

L' autre s n' anet vas sa domna corren.

Qals d' aquels dos fes miels so que 'l taignia?

Amic Lanfrancs, miels complit son viatge,

Al meu semblan, cel que tenc vas s' amia;

E l' autre s fes ben, mas son fin corratge

Non pot saber tan ben si donz a tria

Con cel que 'l vi denan sos oils presen,

Q' atendut l' ac sos cavalliers conven.

E val trop mais qui so que dis aten,

Que qui en als son corratge cambia.

Domna, si us platz, tot can fes d' agradatge

Lo cavalliers que, per sa gaillardia,

Gard' els autres de mort e de damnatge,

Li moc d' amor; que ges de cortezia

Non a nuls homs si d' amor no 'l deisen;

Per qu' el si donz deu grazir per un cen,

Car deslivret per s' amor de turmen

Mantz cavalliers que s vist en la via.

Lanfrancs, oimais non razones mesatge

Tan gran, con fes aquel que tenc sa via;

Que, sapchatz ben, mout i fes gran oltratge,

Pos bels servirs tan de cor li movia,

Car non servi si donz premieiramen;

Et agra 'n grat de leis e jauzimen

Pois per s' amor pogra servir soven

E mans bos luocs, que faillir no i podia.

Domna, perdon vos quier, s' ieu dic follatge,

Q' ueimais vei so que tot o mescrezia,

Que non vos plai qu' autre pelegrinatge

Fassan li drut, mas vas vos tota via.

Per que cavals, c'om voill que biort gen,

Deu om menar ab mesur' e ab sen.

E car los drutz cochatz tan malamen

Lur faill poders, don vos sobra feunia.

Lanfrancs, vos dic que son malvatz usatge

Degra laissar, en aquel mezeis dia,

Lo cavaliers qe domna d' aut paratge,

Bella e pros deu aver en baillia;

Qu'en son alberc servis hom largamen;

Ja el no y fos, mas chascuns razon pren,

Car sai que ha tan de recrezemen,

Q'al maior ops poder li failliria.

Domna, poder ai eu et ardimen,

Non contra vos que us venses en jazen,

Per qu' eu fui fols car ab vos pris conten,

Maz vencutz voill que m' aiatz con que sia.

Lanfrancs, aitan vos autrei e us consen,

Que tant mi sent de cor e d' ardimen

Qu'ab aital geing, con domna si defen,

Mi defendri' al plus ardit que sia.